Það fór ekki framhjá áhugafólki um Formúluna og kappakstur að tímabilið hófst um liðna helgi. Kristján Einar var gestur Gunnlaugs Rögnvaldssonar og Rúnars Jónssonar ásamt Nínu Kristmanns í beinni útsendingu frá fyrstu keppni F1 í Melbourne í Ástralíu og mætti á nýjan leik í þáttinn Við endamarkið til að gera upp keppnina ásamt Einari Viðarssyni.
"Það var mjög gaman að fá að taka þátt í þessum útsendingum og ljóst að Stöð2 Sport ætlar að sinna Formúlunni með miklum glæsibrag," sagði Kristján Einar. "Það er verið að gera hlutina af miklum metnaði þarna og bara frábært að vita að umfjöllun um Formúlu 3 verður í höndum Gunnlaugs Rögnvaldssonar líka."
Stöð2 Sport hefur tryggt sér sýningarréttinn á öllum keppnum mótaraðarinnar sem Kristján Einar keppir í og mun sýna samantektarþætti eftir hverja hinna 11 keppnishelga.
